សាធារណរដ្ឋឆេក៖ ពលរដ្ឋឆេករាប់ពាន់នាក់បានចេញមកធ្វើបាតុកម្មនៅទីលានកណ្តាលរដ្ឋធានី Prague នៅថ្ងៃអាទិត្យម្សិលមិញនេះ ដោយអំពាវនាវឱ្យរដ្ឋាភិបាលលាលែងពីតំណែង ខណៈដែលការតវ៉ានេះបានធ្វើឡើងជុំវិញបញ្ហានៃការកើនឡើងនៃអតិផរណា និងតម្លៃថាមពលខ្ពស់។ យ៉ាងណាមិញ ក្រុមប៉ូលិសមិនបានធ្វើការប៉ាន់ស្មានពីទំហំនៃការតវ៉ានេះទេ ដែលការតវ៉ានេះត្រូវបានក្រុមបាតុករឱ្យឈ្មោះថាជា "ការតវ៉ានៃពលរដ្ឋឆេកប្រឆាំងនឹងភាពក្រីក្រ"។ 

ការតវ៉ាដែលកើតឡើងនេះមានរូបភាពស្រដៀងគ្នាទៅនឹងបាតុកម្មដែលបានកើតឡើងកាលពីខែមីនាកន្លងទៅ ដែលបានរៀបចំឡើងដោយគណបក្សគ្មានអាសនៈក្នុងសភាមួយហៅកាត់ថា PRO ដែលបានរិះគន់ខ្លាំងៗលើរដ្ឋាភិបាលរបស់លោកនាយករដ្ឋមន្ត្រី Petr Fiala ចំពោះការដោះស្រាយវិបត្តិថាមពលដែលបានវាយប្រហារលើអឺរ៉ុបចាប់តាំងពីការឈ្លានពានរបស់រុស្ស៊ីមកអ៊ុយក្រែនកាលពីជាងមួយឆ្នាំមុន។

PRO ក៏បានស្តីបន្ទោសរដ្ឋាភិបាលចំពោះការប៉ះពាល់ដល់សេរីភាពនៃការបញ្ចេញមតិ ដែលជាផ្នែកមួយនៃកិច្ចខិតខំប្រឹងប្រែងដើម្បីប្រឆាំងនឹងព័ត៌មានមិនពិត ហើយបានអំពាវនាវឱ្យមានចំណាត់ការសន្តិភាពចំពោះវិបត្តិសង្គ្រាមនៅអ៊ុយក្រែនផងដែរ។ កន្លងមក គណបក្សប្រឆាំងមួយនេះធ្លាប់ត្រូវបានគេចោទប្រកាន់ថាជាគណបក្សដែលគាំទ្រទៅលើរុស្សី ប៉ុន្តែគណបក្សនេះបានបដិសេធដាច់ខាតចំពោះការចោទប្រកាន់ខាងលើ។ 

អ្នករៀបចំការតវ៉ា និងមេដឹកនាំនៃចលនារបស់គណបក្ស PRO លោក Jindrich Rajchl បាននិយាយទៅកាន់ក្រុមមនុស្សដែលណែនណាន់តាន់តាប់នៅទីលាន Wenceslas Square នៃរដ្ឋធានី Prague ក្នុងគោលបំណងទាមទារឱ្យរដ្ឋាភិបាលបច្ចុប្បន្នលាលែងពីតំណែង ខណៈការតវ៉ានេះមានគោលដៅក្នុងការដង្ហែរញ្ញាត្តិដាក់ទៅការិយាល័យរដ្ឋាភិបាល។ សាធារណរដ្ឋឆេក ក៏ដូចជាប្រទេសផ្សេងៗទៀតនៅអឺរ៉ុបផងដែរ បានទទួលរងផលប៉ះពាល់ដោយការកើនឡើងនៃអតិផរណាដែលបានកើនឡើងខ្លាំងកាលពីអំឡុងឆ្នាំ២០២២កន្លងទៅ៕